पिंपरी-चिंचवडमध्ये वाहतूक नियमांचे उल्लंघन करून किंवा दंड आणि कर न भरल्यामुळे जप्त करण्यात आलेल्या वाहनांबाबत RTO ने मोठा निर्णय घेतला आहे. प्रादेशिक परिवहन कार्यालयाने (RTO) जप्त केलेल्या ९३ वाहनांचा १० जून रोजी ऑनलाइन ई-लिलाव आयोजित करण्याचे जाहीर केले आहे.
मिळालेल्या माहितीनुसार, ही वाहने अनेक महिन्यांपासून RTO च्या ताब्यात आहेत. संबंधित वाहनमालकांना वारंवार सूचना देण्यात आल्या होत्या. मात्र, दंड आणि इतर आवश्यक शुल्क न भरल्याने ही वाहने अद्याप सोडवून घेण्यात आलेली नाहीत. त्यामुळे आता त्यांचा लिलाव करण्याचा निर्णय घेण्यात आला आहे.
हा ई-लिलाव MSTC India च्या अधिकृत संकेतस्थळावर दुपारी १२ ते सायंकाळी ४ या वेळेत पार पडणार आहे. इच्छुक नागरिकांना लिलावापूर्वी वाहनांची प्रत्यक्ष पाहणी करण्याची संधी देखील उपलब्ध करून देण्यात आली आहे. यासाठी पिंपरी-चिंचवड RTO कार्यालय, राजगुरूनगर बस डेपो आणि मंचर बस डेपो येथे भेट देता येणार आहे.
दरम्यान, ज्या वाहनमालकांची वाहने जप्त आहेत त्यांच्यासाठी ही शेवटची संधी मानली जात आहे. आवश्यक कागदपत्रे आणि शुल्क भरून वाहन सोडवून घेता येणार आहे. अन्यथा ती वाहने लिलाव प्रक्रियेत विकली जाणार आहेत.
RTO च्या या निर्णयामुळे एकीकडे प्रलंबित प्रकरणे निकाली निघण्यास मदत होणार आहे, तर दुसरीकडे इच्छुकांना तुलनेने कमी किमतीत वाहन खरेदी करण्याची संधी मिळू शकते.